🔹రైతులు సస్యరక్షణ చర్యలు చేపట్టాలి
🔹రైతు ఐడీ నమోదులో పాలకుర్తి మండలానికి జిల్లా ప్రథమ స్థానం
🔹మండల వ్యవసాయ అధికారి ప్రమోద్ కుమార్
జనోదయ,పాలకుర్తి, అక్టోబర్ 10:
మండల పరిధిలోని వరి పొలాల్లో బ్యాక్టీరియా ఎండాకు తెగులు లక్షణాలు కనిపిస్తున్న నేపథ్యంలో రైతులు అప్రమత్తంగా ఉండి తగిన సస్యరక్షణ చర్యలు చేపట్టాలని మండల వ్యవసాయ అధికారి ప్రమోద్ కుమార్ సూచించారు. ఈసాలతక్కలపల్లి గ్రామంలోని వరి పొలాలను ఆయన క్షేత్రస్థాయిలో పరిశీలించి, పంట పరిస్థితులను సమీక్షించారు.
🔹తెగులు లక్షణాలను గుర్తించాలి
వరి పంట పిలకలు తొడిగే దశలో, చిరుపొట్ట దశలో ఆకులపై పసుపు రంగు మచ్చలు ఏర్పడి, క్రమంగా ఆకుల అంచుల నుంచి ఎండిపోవడం బ్యాక్టీరియా ఎండాకు తెగులు ప్రధాన లక్షణాలని ప్రమోద్ కుమార్ తెలిపారు. పసుపు రంగులో ఉండే జిగురు వంటి బ్యాక్టీరియా ఎండ వేడిమికి గట్టిపడి ఆకులపై చిన్న ఉండలుగా ఏర్పడే అవకాశం ఉందన్నారు. రైతులు ఈ లక్షణాలను గుర్తించిన వెంటనే వ్యవసాయ అధికారులను సంప్రదించి తగిన చర్యలు తీసుకోవాలని సూచించారు.
🔹సస్యరక్షణ చర్యలు తప్పనిసరి
తెగులు నివారణకు రైతులు నత్రజని ఎరువుల వినియోగంపై జాగ్రత్త వహించాలని, పొటాష్‌ కలిగిన ఎరువులను వ్యవసాయ అధికారుల సూచన మేరకు వినియోగించాలని తెలిపారు. తెగులు సోకిన పొలం నుంచి ఇతర పొలాలకు నీరు పారకుండా జాగ్రత్తలు తీసుకోవాలన్నారు. అవసరమైనప్పుడు ఎకరాకు ప్లాంటోమైసిన్‌–కాపర్‌ ఆక్సీక్లోరైడ్‌ 150 గ్రాములు లేదా కాసుగామైసిన్‌–కాపర్‌ ఆక్సీక్లోరైడ్‌ 300 గ్రాములు వినియోగించవచ్చని సూచించారు. అయితే మందుల వినియోగానికి ముందు స్థానిక వ్యవసాయ అధికారుల సలహా తీసుకోవాలని పేర్కొన్నారు.
🔹రైతు ఐడీ నమోదులో జిల్లా ప్రథమ స్థానం
తెలంగాణ ప్రభుత్వం ప్రతిష్ఠాత్మకంగా చేపట్టిన ‘అగ్రిస్టాక్‌–ఒక దేశం–ఒక రైతు గుర్తింపు కార్డు’ కార్యక్రమంపై కూడా రైతులకు అవగాహన కల్పించారు. రైతులకు ప్రత్యేక గుర్తింపు సంఖ్యను కేటాయించే ఈ ప్రక్రియ భవిష్యత్తులో ఎరువులు, పంట రుణాలు, పంటల కొనుగోలు, రైతుబంధు, ఇతర ప్రభుత్వ రాయితీలు, సంక్షేమ పథకాల ప్రయోజనాలు పొందేందుకు ఉపయోగపడుతుందని వివరించారు.
రైతు ఐడీ నమోదు ప్రక్రియలో పాలకుర్తి మండలం 87.27 శాతం నమోదు పూర్తి చేసి జిల్లాలో మొదటి స్థానంలో నిలిచిందని తెలిపారు. ఇంకా నమోదు చేసుకోని రైతులు తమ గ్రామ వ్యవసాయ విస్తరణ అధికారిని లేదా మీ సేవా కేంద్రాన్ని సంప్రదించి రైతు ఐడీ పొందాలని సూచించారు.
ఈ కార్యక్రమంలో జయ్యారం వ్యవసాయ విస్తరణ అధికారి కె. శ్రీకాంత్‌, అభ్యుదయ రైతులు పాల్గొన్నారు.
